تاند (شنبه، د جوزا ۱۲ مه) کابل کې د طالبانو واکمن رژیم پر پاکستان تور پورې کړی، چې چین سره د دوی د باور خرابولو هڅه کوي.
د کابل د رژیم ویاند ذبیح الله مجاهد په دې برخه کې د پاکستان د بهرنیو چارو وزارت هغې اعلامیې ته اشاره کړې، چې پکې د پاکستان واک لاندې پښتونخوا کې پر چینایي انجینرانو د یوه برید ملامتي پر افغانستان اچول شوې او ادعا شوې، چې بریدګر یې له افغان خاورې پاکستان ته تللي وو.
ذبیح الله مجاهد وویل: « پاکستان کې د چینایي وګړو موخه ګرځو پاکستان پورې اړه لري او افغانستان پورې هیڅ اړه نه لري او راپور چې پاکستان خپور کړی د افغانستان او چین ترمنځ د باور لمنځه وړلو هڅه ده، موږ بیا بیا دغه رد کړی او غیر منطقي ده.»
د پاکستان بهرنیو چارو وزارت په یوه تازه اعلامیه کې کابل ته د دغه هېواد د کورنیو چارو د مرستیال وزیر په مشرۍ د ورغلي پلاوي په اړه لیکلي، چې دغه پلاوي په یاد شوي برید کې د افغانانو د لاس لرلو اسناد له طالب لوري سره شریک کړی.
پاکستان بیا- بیا د دغه هېواد په نا امنیو کې د افغان خاورې د استعمال ادعا کړې، خو د طالبانو رژیم یې ادعاوې تل بې بنسټه ګڼلي دي.