تاند (پنجشنبه، د جوزا ۱۰ مه) د طالبانو د رژیم چارواکي وایي، چې ایټالیا په بامیان ولایت کې هغو کورنیو ته د کورو جوړولو ژمنه ورکړې چې په سمڅو کې اوسیږي.
د طالبانو د کور او ښار جوړونې وزارت ویلي، چې دغه ژمنه د ایټالیا د فلورانس پوهنتون ریسې مریلا لودا د یاد شوي وزارت له سرپرست شیخ حمدالله نعماني سره په کتنه کړې ده.
د خبرله مخې، اغلې لودا ویلي چې غواړي په دې ولایت کې د درې لکه ډالرو په لګښت دوه پروژې
پلي کړي.
هغې ویلي، د بامیانو په سمڅو کې د اوسیدونکو لپاره سل کورونه جوړوي او هم به د دې ولایت د زرګرانو په سیمه د رغونې اوسمون یو پلان عملي کړي چې ورسره به د دې سیمې بڼه ډیره ښه شي.
پر بامیان سربېره د ننګرهار د شینوارو په ګډون لا هم یو شمېر سیمو کې افغانان په سمڅو کې ژوند کوي.
دوی ته د کور جوړولو بیا- بیا ژمنې شوي، چې مخکې عملي شوي نه دي او اوس یې خلک د عملي کېدو په هیله دي.