تاند (چهار شنبه، د جوزا ۹ مه) د پاکستان پخوانی صدراعظم نواز شریف، چې څه موده مخکې د پاکستان د سترې محکمې لخوا له سیاسته منع شوی او د مسلم لیګ نواز ګوند له مشرۍ ګوښه شوی و؛ بیرته خپلې مشرۍ ته ستون شوی.
دغه ګوند د مې پر ۲۸مه، پر خپله رسمي اېکس پاڼه د عمومي شورا د غونډې ويډيو خپره کړې چې نوموړی يې بېرته د ګوند مشرۍ ته راوستی.
د پاکستان سترې محکمې د ۲۰۱۷ کال د جولايي پر ۲۸مه د شتمنیو نه څرګندولو په تور نواز شريف له سیاسته منع کړ.
نواز شريف پر هغه لګېدلي تورونه رد کړي ول او د هغوی تر شا يې سياسي انګېزه بللې وه.
نوموړی د ۲۰۱۹ کال د نومبر پر ۱۹مه د درملنې لپاره لندن ته لاړ چې شاوخوا څلور کاله وروسته د ۲۰۲۳ کال د اکتوبر پر ۲۱مه پاکستان ته د خپل مخالف تحریک انصاف ګوند له بې واکه کېدو سره پاکستان ته ستون او ګوند یې ظاهراً د ټاکنو له لارې واکمن شو.