تاند (یکشنبه، د جوزا ۶ مه) د زابل ولایت چارواکي وايي، تېره شپه د کابل – کندهار پر لویه لار د یوه بس د چپه کېدو له امله د یوې مېرمنې په ګډون دوه تنه مړه شوي او ۳۷ نور ټپیان دي.
د زابل د عامې روغتيا رييس ميرويس افغان وويل چې دا پېښه د شهرصفا ولسوالۍ په کاريزګي سيمه کې شوې ده.
په ټپيانو کې ٢٦ نارينه او ١١ ښځې شاملې دي چې د درملنې لپاره د ولسوالۍ روغتون ته وړل شوي دي.
په افغانستان کې په نسبي ډول ترافیکي پېښې ډېرې کېږي او لوی دلیل یې د لارو د خرابوالي ترځنګ د موټرجلوونکو بې احتیاطي بلل کېږي.