یکشنبه, جون 16, 2024
Homeخبرونهد امریکا سترې محکمې د ګوانتانامو د ماشوم بندي د استیناف غوښتنه...

د امریکا سترې محکمې د ګوانتانامو د ماشوم بندي د استیناف غوښتنه رد کړه

تاند (دوشنبه، د ثور۳۱ مه) د امریکا د متحدو ایالتونو سترې محکمې نن (دوشنبې) د ګوانتانامو د یوه پخواني کاناډايي بندي د استیناف غوښتنه رد کړه.

هغه په افغانستان کې د خپلو جنګي جنایتونو د تور په اړه د استیناف غوښتنه کړې وه.

د کاناډا په تورنتو کې زېږېدلی عمر خضر په ۲۰۰۲ م کال ۱۵ کلن و چې د افغانستان په جګړه کې ونیول شو او په کیوبا کې د امریکا پوځي زندان ته واستول شو.

خضر په ۲۰۱۰ کال کې د جګړې د قوانینو په سرغړونې د یوه امریکايي سرتیري په وژلو، قتل، دسیسې، د تروریزم په مادي ملاتړ او جاسوسۍ اعتراف وکړ.

نوموړی په اته کاله بند محکوم شو خو په ۲۰۱۲ کال کې کاناډا ته واستول شو چې د بند پاتې موده هلته پوره کړي.

خضر، چې اوس ۳۷ کلن دی، د امریکا له سترې محکمې څخه غوښتي و چې د هغه محکومیت پای ته ورسوي، خو قاضیانو د دوشنبې په ورځ بې له دې چې څه ووايي، پر دې دوسیې له غور کولو ډډه وکړه.

د متحده ایالاتو یوې ابتدايي محکمې مخکې پریکړه کړې وه چې خضر پر خپل جرم د اعتراف په اړه د استیناف له غوښتنې ډډه کړې وه.

د خضر پلار، چې د القاعده شبکې یو تمویلوونکی و او په ۲۰۰۳ کال کې له پاکستاني پوځیانو سره په نښته کې ووژل شو، خپل زوی په ماشومتوب کې افغانستان ته بیولی و.

LEAVE A REPLY

Please enter your comment!
Please enter your name here

- Advertisment -

ادب