خبریاله: عادله ستانکزۍ – په کابل کې پرون (د غويي په 23 مه) ملي او نړيوال نندارتون پرانيستل شو، دا نندارتون به د روان ثور تر ۲۸ پورې دوام لري.
په نندارتون کې ميرمنو ته ۲۰۰ غرفې ځانګړې شوې دي او د مېرمنو بیلابیلې پنځونې پکې نندارې ته وړاندې کيږي.
د نندارتون ګډونوالو ميرمنو هم خوښي څرګنده ګړه چې په داسې نندارتونونو کې ښځو ته هم فرصتونه ورکول کيږي څو دوى خپلې سوداګرۍ ته وده ورکړي او وکولى شي چې د نورو ميرمنو لاس نيوى وکړي او هم يې خپل اقتصاد په پښو ودرېږي.
د نندارتون يوه ګډونواله وايي چې نندارې ته د خپلو توليداتو په ايښودو يې وکولى شول چې له ډېرو شرکتونه سره تړون وکړي او هيله لري چې دا به د دې لامل شي چې سوداګري يې يوه ورځ د نړۍ نورو هیوادونو ته پراخه شي.
له سوداګرو ميرمنو سره له پنځلسو تر ديرشو نورو ميرمنو هم د کار کولو فرصتونو موندلي چې په وينا يې خپلو سوداګريزو چارو ته به نوره وده هم ورکړي او داسې نندارتونونه به د لاسي صنايعو د بازار موندنې په برخه کې دوى ته ګټور تمام شي.
ملي او نړيوال نندارتون د صنعت او سوداګرۍ وزارت له لورى جوړ شوى چې بيلابيل افغاني توليدات پکې نندارې ته وړاندې شوي دي.