تاند (۵ شنبه، د ثور ۲۰مه) د پښتونخوا مشهور شاعر او فرهنګي فعال اکمل لېونی، چې د کتابونو په بنجاري هم مشهور و، د ۷۷ کلونو په عمر وفات شو.
مرحوم لېونی د مردان اوسیدونکی او د خدایي خدمتګارو تحریک له متعهدو شاعرانو څخه و، چې د پښتنو د ویښتیا لپاره یې قلمي او عملي مبارزه کړې وه.
د پښتو مشهور شاعر رحمت شاه سایل، د عوامي نشنل ګوند مشر ایمل ولي خان او ګڼو نورو مشهورو څېرو د هغه مړینه ضایع ګڼلې او د خدمتونو ستاینه یې کړې ده.
ارواښاد لېوني د خوارۍ مزدورۍ تر څنګ د پښتونخوا او افغانستان بېلابېلو سیمو ته کتابونه هم د خرڅلاو لپاره وړل، چې له دې امله د کتابونو په بنجاري مشهور شوی و.
هغه په وروستیو کلونو کې له غربت او د پښتورګو له ناروغۍ ځوریده، چې ورسره د نه مرستې له امله فرهنګي کړۍ او پښتانه فرهنګپال نیوکو سره مخ شوي وو.