تاند(چهارشنبه، د ثور ۵ مه) د قزاقستان د صدراعظم مرستیال سیریک ژومانګارین د یوه پلاوي په مشرۍ نن کابل ته راغی.
له ده سره په ملګري پلاوي کې د قزاقستان د دولتي چارواکو ترڅنګ د خصوصي سیکتور یو شمېر استازی مله دي.
د طالبانو د صنعت او سوداګرۍ وزارت له خبرپاڼې سره سم، ټاکل شوې ده چې د قزاقستان مرستیال صدراعظم په کابل کې د افغانستان، ترکمنستان او قزاقستان په درې اړخیزه غونډه کې ګډون وکړي.
د دې غونډې هدف د درو هیوادونو ترمنځ د ترانزیت، سوداګرۍ او ګډې پانګونې په اړه خبرې او په یادو برخو کې د اسانتیاوو د رامنځته کولو پر لارو چارو غور بلل شوی دی.
کابل ته د قزاقستان د مرستیال صدراعظم له راتګ سره هممهاله سبا (پنجشنبې) په کابل کې د دواړو خواوو د جګپوړو چارواکو په ګډون د (افغان قزاق) نندارتون پرانیستل کېږي.
د جدي په میاشت کې قزاقستان اعلان وکړ چې طالبان یې ممنوع ډلو او تنظیمونو له لیسته باسي.
وروسته د قزاقستان د باندنیو چارو وزارت ویندوی وویل چې د دغه هیواد سترې محکمې «د افغانستان اسلامي امارت» د منع شویو ډلو له لیسته ایستلی دی.
د طالبانو حکومت له تاجکستانه پرته د منځنۍ اسیا له نورو هیوادونو سره نسبتاً ښې اړیکې لری.
اذربایجان هم په وروستیو میاشتو کې په کابل کې سفارت پرانیست.