تاند (شنبه، د ثور لومړۍ) د افغانستان د ریللارې ادارې اعلان وکړ چې په لومړي وار یې د ریلګاډي په وسیله او د ایران له لارې ۱۰۰۰ ټنه معدني تیږې ترکیې ته صادرې کړې.
د دې ادارې د خبرپاڼې پر اساس، ترکیې ته یې ټالک صادر کړي دي.
په خبرپاڼه کې دغه راز ویل شوي چې د ترکیې مرسین ښار ته د دغو تیږو د لېږلو لپاره د روزنک د ریلاګاډي په تمځي (سټېشن) کې د ریلاګاډي په وسیله د صادراتو د پیل په مناسبت یوه غونډه جوړه شوه چې د هرات د ریللارې ادارې د رييس ترڅنګ، د دغه ولایت د اطلاعاتو اوکلتور، سوداګرۍ او پانګونې خونو رییسانو او یو شمېر کورنيو او بهرنيو پانګوالو پکې ګډون وکړ.
تر دې مخکې د افغانستان د ترانسپورت او هوايي چلن وزارت ویندوی امام الدین احمدي ویلي و چې افغانستان به په لومړي وار د ریلګاډي په وسیله ترکیې ته صادرات وکړي.