تاند (شنبه، د ثور لومړۍ) د کابل ښار په میرویس میدان کې نن ماښام په یوه چاودنه کې یو تن وژل شوی او درې نور ژوبل دي.
د کابل امنیه قوماندانۍ ویندوی خالد ځدراڼ پېښه تایید کړې او ویلي چې دا چاودنه په یوه بنز موټر پورې د نښتی مقناطبیي بم وه.
د ځدراڼ په وینا د موټر چلوونکی وژل شوی دی.
هغه د پېښې د نورو جزییاتو او د وژل شوي کس د هویت په اړه څه نه دي ویلي.
د طالبانو دوې وسله والې مخالفې ډلې؛ د ملي مقاومت جبهه او د ازادۍ جبهه تل د چاودنو او حملو ادعاوې کوي خو رسنیو او خبریالانو تراوسه پورې د هغوی ادعاوې تایید کړي نه دي.
د ملګروملتو په وروستي راپور کې هم ویل شوي وو چې دا جبهې د ډېرو حملو ادعاوې کوي خو باور نه لري چې د هغوی ادعاوې دې رښتیا وي.
د کابل د میرویس میدان د نننۍ چاودنې مسوولیت تراوسه کومې ډلې په غاړه نه دی اخیستی.