تاند(جمعه، د حمل ۳۰ مه) بي بي سي وايي، څېړنې یې ښيي چې د اوکراین په جګړه کې د روسیې د وژل شویو پوځیانو شمېر تر ۵۰ زرو اوړي.
د بي بي سي پر اساس، د روسیې تلفات د جګړې په دوهم کال کې د لومړي کال پرتله نژدې ۲۵ سلنه زیات دي.
دا نړیواله رسنۍ وايي چې د میډیازونا خپلواکې رسنۍ او رضاکارو ترڅنګ یې د ۲۰۲۲ کال له فبرورۍ څخه د روسیې – اوکراین د جګړې د مرګ ژوبلو شمېر پیل کړی دی.
له دوی سره په هدیرو کې نویو قبرونو د ډېرو سرتېرو د نومونو په موندلو کې مرسته کړې ده.
دا په داسي حال کې ده چې د افغانستان د کابو لس کلن اشغال په موده کې د پخواني شوروي اتحاد شاوخوا ۱۵ زره پوځیان وژل شوي او شاوخوا ۵۷ زره نور ټپیان شوي وو.
بي بي سي وايي چې د دوی د معلوماتو پر اساس، د جګړې په دوهم کال کې تر ۲۷ زره ۳۰۰ ډېر روسي پوځیان وژل شوي دي.
بي بي سي د اوکرایني ځواکونو د مرګ ژوبلو په اړه څه نه دي ویلي خو باور دا دی چې اوکراینیان به تر دې ډېر وژل شوي وي.
اوکراین هم تراوسه پورې په جګړه کې د خپلو وژل شویو ځواکونو د کره شمېر په اړه ډېر معلومات نه دي اعلان کړي خو د دغه هیواد ولسمشر ولودیمیر زیلینسکي د سږ کال په فبرورۍ کې وویل چې ۳۱ اوکرایني سرتېري وژل شوي دي خو د امریکا استخباراتي معلومات ښيي چې تر دې ډېر اوکرایني پوځیان وژل شوي دي.
د کریمیلین ویندوی دیمیتري پیسکوف د روسي ځواکونو د مرګ ژوبلو په اړه وویل، د هغو قوانینو له کبله چې د جګړې په ترڅ کې دا ډول اسرار باید پټ وساتل شي، د روسي پوځیانو د مرګ ژوبلو په اړه معلومات یوازې دفاع وزارت لري.
د روسيې د دفاع وزارت چارواکو د بي بي سي د موندنو په اړه تراوسه څه نه دي ویلي خو دا شمېر تر هغه څه اته برابره ډېر دی چې روسیې د ۲۰۲۲ کال په سپټمبر کې ښودلی و.
بي بي سی وايي چې ښايي د وژل شویو روسي پوځیانو حقیقي شمېر تر دې زیات وي.