تاند (شنبه، د حمل ۲۵ مه) د بلوچستان ایالت په نوشکي کې نامعلومو وسله والو پرون (جمعه) له یوه بس څخه چې ایران ته روان وو، لږترلږه ۹ تنه کښته کړي او وروسته وژلي دي.
د بلوچستان پولیس وايي، وژل شوي کسان پنجابیان وو.
د دوی په وینا، وروسته له دې چې وسله والو بس نوشکي ته نژدې په سلطان چړايي کې ودراوه، د سپرلیو پېژندپاڼې یې وکتلې، هغوی چې پنجابیان وو، له بسه کښته او نور یې رخصت کړل.
د ۹ تنو مړي د بس د درولو له ځایه دوه کیلو متره لیرې وموندل شول.
تراوسه پورې کومې ډلې د دې پېښې مسوولیت په غاړه نه دی اخیستی. په بلوچستان کې پر پوځ او پولیسو اکثره بریدونه د بلوچستان د ازادۍ پوځ کوي.
بلوچ بېلتون غوښتونکي وايي چې د دوی خاوره پنجابیانو استعمار کړې ده. له همدې کبله دا احتمال شته چې دا پېښه له دوی سره تړاو ولري.