تاند (۵ شنبه، د حمل دویمه) د پاکستان دفاع وزیر خواجه آصف خبرداری ورکړی، چې د ده په ادعا که د طالبانو واکمن رژیم په افغانستان کې د پاکستاني طالبانو یا ټي ټي پي فعالیتونه مهار نه کړي؛ دغه هېواد به د خپل قلمرو له لارې هندوستان سره د افغانستان سوداګري وتړي.

نوموړي په یوه تازه مرکه کې ویلي، که د کابل واکمنان ورسره د دښمنۍ چلند وکړي، دوی به هم هند سره د سوداګریز دهلیز لاره ورنه ګړي.

خواجه آصف په عین حال کې تور پورې کړی چې له افغانستان څخه دوی ته د ټي ټي پي د ترهګرۍ خطر د زیاتیدو په حال کې دی.

د طالبانو چارواکو د نوموړي څرګندونو او خبرداري ته تر اوسه غبرګون نه دی ښودلی.

بل لورته: دیپلومات مجلې په یوه تازه مطلب کې ویلي، چې د کابل واکمن طالبان د پاکستان د فشارونو د محدودولو د مقابلې په لړ کې، د ایران د چابهار بندر له لارې هند سره د سوداګرۍ د زیاتولو او اسانولو په هڅه کې دي.

دا په داسې حال کې ده، چې څه موده مخکې د طالبانو یو اقتصادي پلاوی ایران ته په سفر تللی و او له چابهار بندر څخه د لیدنې پر مهال یې په دغه بندر کې یې د لسګونه میلیونه ډالره د پانګونې خبر ورکړی و.

ایراني چارواکو ویلي وو، چې طالب پلاوي ورڅخه په دغه بندر کې د دفتر ورکولو غوښتنه هم کړې ده

پاکستان له اوسني خبرداري مخکې هم د کراچۍ بندر له لارې هندوستان ته د افغان سوداګریزو توکیو د لېږد په برخه کې ګڼې ستونزې رامنځته کړې او افغان سوداګرو ته ګڼ زیانونه اړولي وو.