تاند(سې شنبه، د حوت ۲۹ مه) پاکستاني رسنیو د خپل هیواد د چارواکو په قول وویل، د پکتیا ولایت د ډندوپټان او د خیبرپښتونخوا د پاړه چینار ترمنځ پر دیورند کرښه په پرونۍ نښته کې دپاکستان د پوځ یو کپتان وژل شوی او دوه نور پوځیان ژوبل شوي دی.
د کورمې ضلعې د پولیسو یوه چارواکي (ډي پي او) مظهر جهان رسنیو ته وویل چې پاکستاني پوځیانو ته مرګ ژوبلې اوښتې دي.
افغان طالبانو کرښې ته څېرمه د پاکستان په پوځي ځایونو باندې دا بریدونه وروسته له دې وکړل چې د پاکستان پوځ د افغانستان په پکتیا او خوست ولایتونو کې پر ملکي ځایونو بمباري وکړه او د ۵ ښځو او ۳ ماشومانو په ګډون یې ۸ تنه ووژل.
د طالبانو د بهرنیو چارو وزارت ویلي چې په کابل کې یې د پاکستان د سفارت سرپرست احضار کړ او احتجاج یې ورته څرګند کړ.
له بلې خوا د امریکا د بهرنیو چارو وزارت یوه ویاند ویلي، چې واشنګټن د طالبانو د رژیم او پاکستان پرونیو ناندریو اندېښمن کړی.
ویاند ودانت پتیل زیاته کړه، چې دوی په افغانستان کې د پاکستان د هوایي بمبارۍ له امله ملکي مرګ ژوبلې ته اندېښمن دي.
پتیل له پاکستان سره د ترهګرۍ ضد هڅو کې د امریکا د مرستو په باب وویل چې امریکایي چارواکي له پاکستاني مشرانو سره په دوامداره توګه د ترهګرۍ ضد بحثونه مخته وړي او د افغانستان په اړه هم په جزییاتو ورسره خبرې کوي.