تاند (یکشنبه، د حوت ۲۷ مه) د طالبانو د ریاست الوزراء سیاسي مرستیال مولوي عبدالکبیر نن په کابل کې د چین له سفیر ژاو شینګ سره په کتنه کې د دواړو هېوادونو ترمنځ په دوه اړخیزو اړیکو خبرې اترې وکړې.
د طالبانو د اعلامیې له مخې، په دې لیدنه کې شینګ زیاته کړه،چین د افغانستان په کورنیو چارو کې لاسوهنه نه کوي؛ مګر په نړیوالو ناستو کې یې ټینګار کړی چې باید د افغانستان له اوسني رژیم سره تعامل وشي.
نوموړي دا هم وویل، چې چین غواړي افغان ځوانانو ته د روغتیا په شمول په ګڼو برخو کې تحصیلي بورسونه برابر کړي.
هغه زیاته کړه، د جلغوزو د پروسس او صادراتو په برخه کې د چینایی پانګوالو پانګونې ښه پایله ورکړې او په ګڼو نورو برخو کې هم دخپلې پانګونې له پایلو خوښ دي .
په کابل کې د چین سفیر زیاته کړه، چې د مس عینک کان په برخه کې ښه پرمختګ شوی او ډاډ یې ورکړ، چې چینايي پانګوال په افغانستان کې په ګڼو نورو پروژو کې پانګونې ته لېواله دي.
مولوي عبدالکبیر د دوحې او په نورو ناستو کې د افغانستان په اړه د چین له دریځ څخه مننه وکړه او ویې ویل، چې د دوی رژیم له چین سره په بېلابېلو برخو کې د اړیکو او همکاریو پراختیا ته ژمن دی.
نوموړي د واخان لاره د دواړو هېوادونو په اړیکو کې غوره تحول یاد کړ، چې په بشپړېدو سره به یې په اقتصادي او سوداګریزه برخه کې د پام وړ زیاتوالی راشي.
دغه طالب مقام، دغه راز د افغانستان د بنسټونو، لویو لارو، رېل پټلۍ او نورو مهمو او سترو پروژو کې د پانګونې غوښتنه وکړه.
نوموړي وویل، دوی هیله لري چې د شانګهای په راتلونکیو ناستو کې د ګډون بلنه ورکړل شي او په دې کنفرانس کې د ناظر غړي په توګه خپل حضور ولري.
هغه له چین څخه په دې برخه کې د همکارۍ غوښتنه وکړه او ویې ویل، چې چین دې د اقتصادي ځواک په توګه خپل تجارب د اقتصادي پیاوړتیا لپاره له افغانستان سره شریک کړي.