تاند (یکشنبه، د حوت ۲۷ مه) د افغانستان په پرځیدلي جمهوري نظام کې د مشرانو جرګې سناتوره انارکلي هنریار وایي، چې هند ته تللي ډېر افغان هندو باوران او سیکان د هغه هېواد تابعیت اخیستو ته لېواله نه دي.
د نوموړې په وینا، د دې نه لېوالتیا یو عمده دلیل دا دی چې هند د خپل تابعیت د قانون له مخې، له تابعیت غوښتونکو غواړي چې له خپل لومړني تابعیته تېر شي.
دا هغه څه دي، چې د هنریار په خبره، زیات افغان هندو باوران او سیکان ورته چمتو نه دي.
انار کلي هنریار په ورته وخت کې د هند د تابعیت د تعدیل شوي قانون له هغې برخې څخه نارضایتي وښوده، چې د افغانستان، پاکستان او بنګله دېش مسلمانان یې د هند له تابعیت اخیستو مستثنا کړي دي.
په هند کې د تابعیت قانون له تازه ناندیز تعدیل سره هم مهاله، راپورونه ښيي چې دغه هېواد په وروستیو کې د یو شمېر افغانانو په ګډون د مذهبي اقلیتونو اړوند ۴۵۰ تنو ته د تابعیت اسناد ورکړي.
هندي رسنیو په مشخص ډول نه دي ویلي، په دغو کسانو کې څومره یې د کوم هېواد اړوند دي، خو د افغانانو په اړه وړاندوېنه دا ده چې تابعیت اخیستونکي ټول هندو باوره او سیکان دي.
افغان هندو باوران او سیکان، د طالبانو له بیا واکمنیدو یانې د ۲۰۲۱ له اګسټ څخه لا مخکې په افغانستان کې سختو امنیتي ګواښونو سره مخ او څو ځلې یې پر را ټولیدنو خونړي بریدونه وشول.
د دغو بریدونو مسوولیت داعش ډلې پر غاړه واخیستل.
پر افغان هندو باورو، د طالبانو له بیا واکمنیدو وروسته هم بریدونو دوام وکړ، چې له امله یې سلګونه نور دغه مذهبي اقلیتونه هم هېواد پرېښودو ته اړ او تر ډېره هندوستان ته وکوچېدل.