تاند (شنبه، د حوت ۲۶ مه) د طالبانو د بهرنیو چارو وزیر ملا امیرخان متقي د پاکستان او ازبکستان د بهرنیو چارو وزیرانو سره ټلیفوني خبرې کړې دي.
د ملا متقي مطبوعاتي دفتر په دوو اعلامیو کې ویلي: مولوي امیر خان متقي د پاکستان د بهرنیو چارو وزیر محمد اسحاق ډار سره تلیفوني خبرې وکړې.
د سرچینې د معلوماتو له مخې، ملا متقي لومړی ښاغلي محمد اسحق ډار ته د پاکستان د بهرنیو چارو د وزیر په حیث د ټاکل کیدو مبارکي وویله او هیله یې وښوده چې د نوموړي ټاکنه به د دواړو ګاونډیو هیوادونو تر منځ د اړیکو په پیاوړتیا کې مثبت او رغنده رول ولري.
متقي وویل: چې سیمه ورځ تر بلې خپل مثبت تعاملات زیاتوي او د سیمې په کچه د سترو زیربنایي پروژو عملي چاري په پیلیدو دي او د پاکستان د رغنده برخې اخیستلو په تمه یو.
متقي، دغه راز ډار ته افغانستان ته د سفر کولو بلنه ورکړه.
ښاغلي اسحق ډار له متقي صاحب څخه مننه وکړه او هوډ یې څرګند کړ چې د خپل ماموریت په موده کې به د اړیکو د پیاوړتیا او پراختیا لپاره هلې ځلې وکړي.
په پای کې دواړو لوریو په ډیورنډ کرښه د مسافرو، مریضانو او سوداګریز تګ راتګ کې د اسانتیاو په راوستولو او د شته ستونزو په لمنځه وړلو ټینګار وکړ.
د یو بل له خبر له مخې: د طالبانو د بهرنیو چارو وزیر مولوي امیر خان متقي او د ازبکستان جمهوریت د بهرنیو چارو وزیر بختیار سعیدوف ټیلیفوني خبرې وکړې.
په دې مکالمه کې دواړه لوري کابل ته د ازبکستان د بهرنیو چارو وزیر پر وروستي سفر، شویو توافقاتو او د مسایلو د تعقیب په اړه وغږیدل. دواړه لوریو ډاډ ورکړ،
چې د دواړو هېوادونو اړوندې ادارې به د شویو توافقاتو پر پلي کولو کار کوي او د کارونو د تعقیب په موخه به د لوړې کچې اړیکې ساتي او په راروانو څو ورځو کي به د اړونده چارو د وزیرانو په کچه تعقیبي غونډه کیږي.