تاند (جمعه، د حوت ۲۵مه) ټاکل شوې ده، چې د ملګرو ملتونو امنیت شورا نن په افغانستان کې د ملګرو ملتونو استازولۍ (یوناما) ماموریت د غځولو په اړه پرېکړه وکړي.
د یاد شوي سازمان، امنیت شورا په یوه خبرپاڼه کې ویلي چې د دغه پرېکړه لیک مسوده د جاپان له لوري چمتو شوې، چې ټاکل شوې د یوناما ماموریت د ۲۰۲۵ زېږدیز کال د مارچ تر ۱۷مې وغځوي.
یوناما، چې تر دې مخکې یې په افغانستان کې د طالبانو واکمن رژیم له کړنو خوښ و؛ اوس یې د طالب رژیم د کړنو په اړه له څو انتقادي راپورونو وروسته پر وړاندې د طالبانو دریځ بدل شوی.
د طالبانو د رژیم ویاند ذبیح الله مجاهد تور پورې کړی، چې ګواکې یوناما د امریکا د تګلارو له مخې د دوی خلاف تبلیغاتي راپورونه خپروي.
مجاهد په عین حال کې، د دغې ادارې د ماموریت د تمدید یا نه تمدید په تړاو د خپل رژیم دریځ نه دی په ډاګه کړی.
مخکې د طالبانو چارواکو د افغانستان لپاره د ملګرو ملتونو د یوه بل ځانګړي استازي د ټاکلو مخالفت په دې دلیل کاوه، چې د دوی په باور د یوناما ادارې په موجودیت کې ورته اړتیا نه ویني.
څرګنده نه ده، چې طالبان پر یوناما له نیوکو او مخالفتونو سره له کومې لارې نړیوالو سره د اړیکو چینلونه مخته وړل غواړي؟