تاند (سې شنبه، د حوت ۲۲ مه) د طالبانو تر واک لاندې باختر اژانس د طالبانو او ایراني ځواکونو تر منځ د ځینو سرحدي ستونزو او په اړه یې د دواړو لوریو د خبرو خبر ورکړی.
یاد شوي اژانس د افغانستان په لویدیځ کې د طالبانو د ٢٠٧ الفارق قول اردو د وياند عزت الله سعيدي له قوله لیکلي: په دې غونډه کې د ایران له لوري د تهانه تپې سیاه ته څېرمه د سړک جوړولو او دغه راز د اسلام قلعه ګمرک او د دوغارون ګمرک د سرحدي عسکرو او طالبانو ترمنځ د شخړې په اړه خبرې وشوې.
سعیدي زیاته کړه چې په دې غونډه کې د دغو ستونزو په هواري پرېکړه وشوه چې اوسمهال د مسافرو تګ راتګ بېرته عادي حالت ته راګرځېدلی دی.
سرچینې یادې خبرې د دواړو لوریو د ځایي سرحدي چارواکو تر منځ ترسره شوې ګڼلي، خو نور جزییات یې په اړه نه دي ورکړي.
د طالبانو له بیا واکمنیدو سره، د دوی او ګاونډیو هېوادونو تر منځ وخت پر وخت سرحدي ستونزې رامنځته شوي، چې وروسته یې د بېرته حل خبر ورکړل شوی.