تاند (چار شنبه، د حوت ۱۶ مه) د غزني لپاره د طالبانو سیمه ییزو چارواکو ویلي، چې د دغه ولایت په اندړو ولسوالۍ کې تېره شپه په یوه ترافیکي پېښه کې اته تنه مړه شوي دي.
په غزني کې د طالبانو امنیه قوماندانۍ په یوه اعلامیه کې ویلي دي چې پېښه د اندړو ولسوالۍ په ناني سیمه کې هغه مهال وشوه چې یو ۴۰۴ ډوله مسافروړونکي بس د کابل کندهار پر لویه لاره له یوه باروړنکی مازدا سره ټکر وکړ.
په بیان کې راغلي دي چې په پېښه کې ۳۰ کسان هم ټپیان شوي چې د ځینو یې حالت نازک بلل شوی.
ویل شوي چې دواړه موټر له غزني څخه د کابل پر لور د حرکت په حال کې وو.
د طالبانو د حکومت د ترافیکو عمومي ریاست نژدې دوه اونۍ مخکې وویل چې په تېرو لسو میاشتو کې د افغانستان په بېلابېلو سیمه کې په ترافیکي پېښو کې ۱۶۰۰ کسان مړه شوي او تر ۴ زرو زیات نور ټپیان دي.
د کندهار- کابل لویه لاره له ډېرو کلونو راهیسې د افغانستان له تر ټولو مرګونو لارو څخه ده چې ترافیکي پېښې پکې ډېرو کسانو ته مرګ ژوبله اړوي.