تاند (سې شنبه، د جوت ۱۵ مه) د افغانستان او ایران د ترانسپورت وزارتونو چارواکو په خپل منځ کې د مځکني ترانسپورت د پراختیا پر امکاناتو خبرې وکړې.
د طالبانو د حکومت د ترانسپورت وزارت نن (سې شنبې) په یوه خبرپاڼه کې ویلي چې د ایران د ترانسپورت وزارت پلاوي، چې کابل ته په سفر ورغلی، د افغانستان د ترانسپورت وزارت له چارواکو سره پرون (دوشنبې) مازدیګر د ترانسپورت او د نړیوالو مځکنیو لارو په اړه خبرې وکړې.
په خبرپاڼه کې همداراز ویل شوي چې په دې خبرو کې د تګ راتګ د جوازونو، د لګښتونو د کمېدو او نورو موضوعاتو په اړه پرېکړې وشوې.
له ایراني پلاوي سره په خبرو کې د طالبانو د حکومت د ريیس الوزرا د اقتصادي مرستیال د دفتر استازي او دغه راز د مالیې، بهرنیو چارو او صنعت او تجارت وزارتونو استازو ګډون درلود.
دا خبرې وروسته له دې کېږي چې د طالبانو د حکومت دوه پلاوي چاه بهار بندر ته لاړل او افغان سوداګرو اعلان وکړ چې د پاکستان د لارو پر ځای نور د ایران له لارو هیواد ته تجارتي مال واردوي او صادروي.