تاند( شنبه، د حوت ۱۲ مه) د کونړ لپاره د طالبانو ولایتي چارواکي وايي چې د دغه ولایت په مرکز اسعد اباد کې د کور د چت غورځېدو له امله ۷ تنو ته مرګ ژوبله اوښتې ده.
د دغه ولایت لپاره د طالبانو والي مولوي قدرت الله ابو حمزه وویل، چې نن سهار د دغه ولایت د مرکز اسعد اباد اړوند په اندرسیر کلي کې د زیاتو ورښتونو له امله د یوه کور چت نړېدلی چې په پایله کې ۴ تنه مړه او ۳ نور ټپیان شوې دي.
د یادونې وړ ده، چې دوې ورځې وړاندې په هلمند کې هم د اورښتونو له امله د چت غورځېدو پېښه کې ۵ تنه مړه شوي وو.
طالب چارواکو د زیانمنو د لاسنیوي؛ په ځانګړي ډول د څارویو د خوندیتوب لپاره د هڅو د پيل خبر ورکړی، خو نور زیانمن شوي شکایت لري چې تر اوسه ورسره چا مرسته نه ده کړې.