تاند (چارشنبه، د حوت ۹ مه) راپورونه وایي، چې په افغانستان کې د ورښتونو او سېلابونو له امله په لسو ولایتونو کې د ګوزڼ یا پولیو پر ضد د واکسین پیل شوی کمپاین ځندیدلی.
دا خبره، له پولیو څخه د پاک افغانستان پروګرام د سه شنبې په ورځ (فبروري ۲۷) په ایکس ټولنیزه شبکه (پخواني ټویټر) کې کړې ده.
سرچینې زیاته کړې، که څه هم د افغانستان په ډیرو سیمو کې د پولیو واکسیناسیون روان دی، خو د واورو، باران او سړې هوا له امله په کاپیسا، پروان، رزګان، زابل، هلمند، کندهار، غزني، خوست، هرات او فراه ولایتونو کې د پولیو یا د ماشومانو د ګوزڼ ضد واکسین ځنډول شوی دی.
د یاد شوي پروګرام مسوولینو په دې تړاو نور جزییات نه دي ورکړي.
معلومه نه ده، چې له واکسینه محروم شوي ولایتونه بیا کله دا واکسین پيلوي.
افغانستان او پاکستان د نړۍ یوازیني دوه هېوادونه دي، چې لا هم پکې پولیو یا ګوزڼ ویروس په بشپړه توګه له منځه نه دی تللی.