تاند ( دوشنبه، د دلوې ۲۳مه) د سعودي عربستان مشهورې رسنۍ « العربیه» د خپلو سرچینو له قوله خبر ورکړی، چې د طالبانو په زندان کې د یوه امریکایي بندي د تبادلې په بدل کې د ګوانتینامو زندان د وروستني افغان بندي محمد رحیم حقمل د خوشې کېدو هڅې روانې دي.
سرچینه زیاتوي، هڅه کیږي چې رحیم حقمل واشنګټن ته د جاسوسۍ په بدل کې د طالبانو لخوا د نیول شوي امریکایي وګړي« رایان کوربت» سره تبادله شي.
دغه امریکایي تبع د ۲۰۲۲ په اګسټ کې طالبانو په دې تور ونیوه، چې ګواکې د کابل په شېرپور کې یې د القاعدې شبکې د مشر ایمن الظواهري د وژل کېدو برید سره همکاري کړې ده.
کابل کې د طالبانو واکمن رژیم او امریکایي چارواکو په دې اړه څه نه دي ویلي.
د طالبانو رژیم نن له عمان څخه کابل ته د ګوانتینامو زندان د دوو خوشې شویو طالب بندیانو د لېږد اعلان وکړ.
طالبانو څه موده مخکې وویل، چې په بهرنیو هېوادونو کې یې د افغان بندیانو د خلاصون هڅې زیاتې کړي او په دې اړه یې یوه لوړپوړې کمېټه ټاکلې ده.