تاند ( شنبه، د دلوې ۲۱مه) د طالبانو د رییس الوزرا سیاسي مرستیال مولوي عبدالکبیر، د دوی د کورنیو چارو د وزیر سراج الدین حقاني برعکس له نړیوالو غوښتي چې د دوی رژیم په رسمیت وپېژني.
سراج الدین حقاني پرون په پکتیا کې یوې ولسي غونډې ته د وینا پر مهال ویلي، چې ور ته په رسمیت پېژندل مهم نه دي او تمه نه لري چې تر لسو کلونو دې د دوی رژیم په رسمیت وپېژندل شي.
د مولوي کبیر دفت بیا په یوه اعلامیه کې ویلي، چې هغه د جمعې په ورځ په افغانستان کې د یوناما دفتر له مشرې سره لیدلي.
نوموړي په دغه لیدنه کې ویلي: زموږ اسلامي امارت د رسمیت پېژندنې لپاره ټول شرایط پوره کړي، باید په رسمیت وپېژندل شي او په ملګرو ملتونو کې د افغانستان دایمي څوکۍ اسلامي امارت ته وسپارل شي.
هغه د نړیوالو له لوري پر طالب چارواکو بندیزونه غیر عادلانه وبلل او زیاته یې کړه، چې دغو بندیزونو له نړۍ سره د تعامل، مذاکراتو او سیاسي تفاهم مخه ډب کړې ده.
د افغانستان لپاره د ملګرو ملتونو له ځانګړې استازې روزا اوتنبايوا په دې لیدنه کې ویلي: سره له دې چې په نړۍ کې کړکېچونه او مهم موضوعات ډېر دي، خو بیا هم افغانستان د نړۍ له ياده نه دی وتلی او غواړي په مختلفو برخو کې ورسره مرستې وکړي”.
د نوموړې په وینا، د دوحې راتلونکې غونډه د افغانستان او افغانانو لپاره د بشري مرستو جلبولو او د ثبات او پرمختګ لپاره ښه فرصت دی.
د دوحې غونډې د روانې فبرورۍ میاشتې په اتلسمه او نولسمه ترسره کیږي.
طالب چارواکو ویلي، چې تر اوسه یې په دې غونده کې د خپل پلاوي د ګډون به اړه وروستۍ پرېکړه نه ده کړې.