تاند ( دوشنبه، د دلوې ۱۶ مه) ځینو رسنیو د سېدحمزه علوي په نوم د ایران د فاطمیون ډلې د یوه افغان غړي د وژل کېدو خبر ورکړی او ویلي، چې هغه په سوریه کې د ایران پلوه وسله والو پر مرکزونو د امریکا په وروستیو بریدونو کې وژل شوی.
د راپورونو له مخې، سید حمزه علوي په ۱۳۳۷ کال کې د افغانستان په پروان کې زېږیدلی او د شوروي خلاف د افغانستان د جګړې تر څنګ په عراق کې د ایران د جګړې پر مهال جنګېدلی و.
د هغه او په فاطمیون وسله واله ډله کې د نورو افغانانو د ګډون او څرنګوالي په اړه نور جزییات نه دي ورکړل شوي.
فاطمیون ډله د ایران د استخباراتي او مذهبي ادارو په ګډو هڅو تر ډېره له سخت دریځه شیعه وسله والو څخه جوړه شوې، چې پر ایران سربېره د افغانستان او یو شمېر نورو هېوادونو شیعه مذهبه وګړي پکې ګډون لري.
په افغانستان کې د طالبانو واکمن رژیم د سید حمزه علوي د وژل کېدو او په دې برخه کې د خپل دریځ په تړاو څه نه دي ویلي.