تاند (چار شنبه، د دلوې ۱۱مه)د پاکستان پخوانی صدراعظم عمران خان نن له خپلې مېرمنې بشرا خان سره یو ځای د فساد په تور محاکمه او دواړو ته د څوارلسو- څوارلسو کلونو د بند سزا اعلان شوه.
د عمران خان تحریک انصاف ګوند ویلي چې سربېره پر دې د محکمې د حکم په اساس پخوانی صدراعظم د راتلونکو لسو کلونو لپاره په دولتي څوکیو له کار کولو هم بې برخې شوی دی.
دې ګوند همداراز ویلي دي چې د محکمې له حکم لنډې شېبې وروسته بشرا خان چې په بشرا بي بي مشهوره ده هم ونیوله.
عمران خان پرون د دولتي محرمو اسنادو د افشا کولو په جلا قضیه کې د یوې ځانګړې محکمې له خوا په لس کاله بند محکوم شو.
عمران خان او مېرمن یې تورن دي چې د ده د واکمنۍ پرمهال یې دولتي سوغاتونه ساتلي او پلورلي دي.
د هغه د ګوند او پلویانو لخوا یاد شوي تورونه او اعلان شوي مجازات غندل شوي او ورسره پر مخالفت ټینګار شوی.
دا په داسې حال کې ده چې د فبرورۍ په اتمه پاکستان پارلماني انتخابات لري.
نو هغه به څه ملت او دولت وي ، چې حکومت مشر یې له خپل ملت نه ملي مسایل او رازونه پټ کړي؟
کوم صدراعظم چې انتخابي او د ملت په رایو واک ته رسېدلی وي ، باید له خپل ملت نه کوم شی او راز پټ نه کړي . له خپل ملت نه مهم پټ کړل شوي رازونه که کوم وخت رسوا شول ، د ټول تاریخ مختوري او ملامت به وي .