تاند(یکشنبه، د دلوې ۸) د پاکستان او په افغانستان کې د طالبانو د واکمن رژیم په اړیکو کې د ترېنګلتیا له زیاتیدو سره هم مهاله، د پاکستان موقت صدراعظم انورالحق کاکړ یو ځل بیا له دغه هېواده د پاتې افغان کډوالو د ایستو پر دوام ټینګار کړی.

کاکړ په یوه تازه مرکه کې ویلي، چې له پاکستانه به د بې اسناده افغان کډوالو د ایستو په دوام، په ورپسې پړاوونو کې نور افغان کډوال هم وباسي.

هغه په دې تړاو نور جزییات نه دي ورکړي.

له دې سره، د پاکستان د پلازمېنې اسلام اباد له یو شمېر سیمو څخه یو ځل بیا له څو ورځو راهیسې د افغان کډوالو د نیولو او خپل هېواد ته د شړلو راپورونه ورکړل شوي.

پاکستاني چارواکو په دې اړه څه نه دي ویلي

د افغان کډوالو وروستۍ نیونې او هېواد ته ستنول یې تر هغې وروسته دي، چې ویل کیږي د پاکستان د جمیعت علمای اسلام ګوند مشر ملا فضل الرحمان افغانستان ته له سفره تش لاس ستون شوی او پاکستاني چارواکي دغه کار غوسه کړي.

تېره چارشنبه، د پاکستان د پوځ مشر جنرال عاصم منیر په یوه پاروونکې وینا کې وویل، چې ټول افغانستان د یوه پاکستاني هومره ارزښت نه ورته لري.

پرون د طالبانو لوی درستیز قاري فصیح الدین فطرت د هغه په غبرګون کې د پاکستان چارواکي په « بې کفایتۍ او سپوونکو خبرو» تورن او له پاکستانیانو یې وغوښتل چې د خپلو چارواکو د داسې خبرو پر وړاندې ودرېږي.

پاکستان له تېرو شاوخوا ۵ میاشتو راهیسې څه باندې ۵ سوه زره افغان کډوال له خپلې خاورې په زوره د دوی هېواد ته وشړل، چې د دوی او نړیوالو سازمانونو د معلوماتو له مخې، په افغانستان کې یې د فقر او بې کارۍ شرایط نور هم سخت کړي او له کډوالۍ تازه ستانه شوي افغانان هم په ناوړه وضعیت کې دي.