تاند (پنجشنبه، د دلوې ۵ مه) ټاکل شوې ده چې په لنډو ورځو کې کابل، دوحه او مسکو د افغانستان په اړه د درو کنفرانسونو کوربانه وي.
په کابل کې به راتلونکې اوونۍ د دوحې تر غونډې وړاندې د افغانستان د ګاونډیو هیوادونو د استازو په ګډون غونډه جوړه شي.
د ایران د بهرنیو چارو وزارت نن اعلان وکړ چې استازی یې د کابل په غونډه کې ګډون کوي.
د ایران د باندنیو چارو وزارت د د جنوبي اسیا د چارو عمومي رييس سیدرسول موسوي پر خپله ایکسپاڼه لیکلي:«راتلونکې اوونۍ به کابل د سیمه ییز دیپلوماتیک تحرک شاهد وي. د کابل سیمه ییزه ناسته، چې ایران، پاکستان، روسیه او چین پکې حتماً ګډون کوي او د دوحې د دلوې د ۲۸ نېټې تر غونډې مخکې جوړېږي، د افغانستان سولې، ثبات، د افغانانو سوکالۍ او د سیمې امنیت ته د ګاونډیو هیوادونو د ځانګړې پام ښکارندويي کوي.»
له بلې خوا د ملګروملتونو سرمنشي انتونیو ګوتیرش به راتلونکې میاشت د افغانستان په اړه د دې سازمان د غړیو هیوادونو او سیمه ییزو سازمانو د ځانګړیو استازیو د غونډې مشري وکړي.
د ملګروملتونو د رسمي ویبپاڼې د راپورله مخې دغه غونډه به د فبرورۍ په اتلسمه او نولسمه د قطر په پلازمینه دوحه کې جوړه شي.
د دې غونډې هدف، د افغانستان په اړه د هغې خپلواکې ارزونې په رڼا کې په منظمه او همغږي توګه د نړیوال مشارکت زیاتوالی ښودل شوی چې په دې وروستیو کې د ملګروملتونو د سر منشي د ځانګړي استازي فریدون سینیرلي اوغلو له خوا ترسره شوې ده.
د ملګروملتونو په وینا د دې غونډې پر جوړولو او نورو اړوندو تیاریو باندې کار روان دی.