تاند (پنجشنبې، د دلوې ۵ مه) د طالبانود حکومت د لوګر ولایت د پوهنې ریاست مسوولان وايي چې د دغه ولایت په لیرې پرتو سیمو کې د (WYFA) موسسې په همکارۍ ۲۳۸ سیمه ییز ټولګي جوړېږي.
د لوګر د پوهنې ریاست چارواکو دا خبر پرون (چهارشنبې) د تعلیم د نړیوالې ورځې په مناسبت ورکړ.
د لوګر د پوهنې رئیس مولوي جنت ګل عزیز د ډبلیو وای ایف اې موسسې د فعالیت پر پیلېدو خوښي وښوده او ترڅنګ یې د دې موسسې مسولانو ته د هر ډول همکاریو ډاډ ورکړ.
یاده موسسه د لیرې پرتو سیمو له زده کړو محرومو ماشومانو ته د زده کړو زمینې د برابرولو په برخه کې کار کوي او له زده کړو بې برخو ماشومانو د باسواده کولو په موخه ۲۳۸ سیمه ییز ټولګي جوړوي.
حاضر دمه په لوګر ولایت کې د مرستندویړ موسسو په مالي لګښټ ګڼ شمېر سیمه ییز ټولګي فعالیت کوي.
خو دا په داسې حال کې ده چې د طالبانو حکومت له شپږم ټولګي پورته نجونې له زده کړو منع کړي او په دې ډول یې افغانستان د نړۍ په خورا منزوي او د ښځو د حقونو له نظره تر ټولو په بدنامه هیواد بدل کړی دی.