تاند (سې شنبه، د دلوې ۳ مه) د افغانستان د ټرانسپورت او هوايي چلند وزارت لپاره د طالبانو چارواکو ویلي، چې ژر به له خوست څخه متحده عربي اماراتو ته د الوتنو لړۍ پيل شي.
د دغه وزارت ویاند امامالدین احمدي ویلي، دغه وزارت هڅه کوي چې د هېواد ټول هوايي ډګرونه پر نړۍوالو معیارونو برابر کړي.
د نوموړي د معلوماتو پر بنسټ، پر هېواد د طالبانو له بیا واکمنېدو وروسته، د فلای دوبۍ، اېر العربیه، کېش، ماهان او تبان په ګډون ځينو نړۍوالو شرکتونو افغانستان ته خپلې الوتنې بېرته پېل کړې دي.
یو شمېر خلکو د الوتنو د بیا پيل د لړۍ هرکلی کړی، خو د تکتونو د بیو له لوړوالي یې شکایت هم کړی.
د خوست یوه برخه په متحده عربي اماراتو کې کاروباریان او مساپر دي، چې د الوتنو د پيل خبر خوشاله کړی دي.