تاند (شنبه، د جدې ۳۰ مه) د چینايي پانګوالو یوه ډله غواړي چې په افغانستان کې په لمریزه انرژۍ ۵۰۰ میلیون ډالره پانګونه وکړي.
د دغه چینايي پانګوونکي ګروپ غړیو پرون (جمعه) په اسلام اباد کې د افغانستان د طالبانو د حکومت له شارژدافېر سره ولیدل.
په اسلام اباد کې د افغانستان سفارت په یوه خبرپاڼه کې ویلي چې د چینايي پانګوونکو ډلې د افغانستان د اقتصاد اوسني لرلید ته خوشبیني وښوده.
د افغانستان د سفارت شارژدافېر چینايي پانګوالو ته ډاډ ورکړ چې د دوی اسلامي امارت اقتصاد محوره پالیسۍ ته ژمن دی او پانګوالو ته د داسې چاپېریال د برابرولو ډاډ ورکوي چې شفاف وي او د دواړو خواوو ګټه پکې خوندي وي.
د سفارت په خبرپاڼه کې نه دي ویل شوي چې چینايي پانګوالو په کومه برخه کې د پانګونې ژمنه کړې او دا یادونه یې هم نه ده کړې چې هغوی به کله په افغانستان کې په پانګونې پیل وکړي.