تاند (یکشنبه، د جدې ۲۴ مه) د افغانستان د پرځیدلي جمهوري نظام یوه مقام عمر داودزي په یوه مرکه کې د طالبانو د واکمن رژیم په اړه ادعا وکړه، چې مشران یې په نظریاتي لحاظ نه؛ بلکې په تصادفي ډول پښتانه دي.

هغه په کندهار کې د طالبانو تحریک رامنځته کېدو ته په اشارې وویل: که د جهادي تنظیمونو د واکمنۍ پر مهال د طالبانو تحریک په بدخشان کې رامنځته شوی وای، طبیعي وه چې ډېر مشران به یې د بدخشان تاجکان وای.

داودزي زیاته کړه، چې طالبانو له رامنځته کېدو تر ننه په مختلفو پړاوونو کې له قومي، سمتي او نورو کارتونو هم د ځان په ګټه کار اخیستی، خو د ده په باور، دغه تحریک اساساً یو مذهبي جریان دی، چې ځان په خپل مزاج د «اسلامي نظام» په رامنځته کولو مکلف بولي.

عمر داودزي په دې مرکه کې د نجونو له زده کړو او د ښځو له کار سره مخالفت او په قدرت کې د نورو نه شریکول د طالبانو نه پای ته رسېدونکي دریځونه وبلل.

د هغه په وینا، د طالبانو د تېرې واکمنۍ پر مهال د ملګرو ملتونو لوړپوړی کارکوونکی و او یو ځل کندهار ته د یوه ډېر باصلاحیته پلاوي په ترکیب کې تللی و.

سرچینه زیاتوي: طالب مشرانو ته مو وویل، چې د نجونو د زده کړو او کار لپاره چې هر ډول شرایط وضع کوئ، نړیوال یې منلو ته چمتو دي او تړون یې درسره کوي، خو له څو ورځې خبرو وروسته طالب استازو موږ ته وویل، چې په دې اړه موږ هیڅ انعطاف نه شو کولی.

طالب چارواکو د عمر داودزي دغو څرګندونو ته غبرګون نه دی ښودلی، خو په عمومي توګه د ځان په اړه هر ډول منفي قضاوتونه او ادعاوې بې اساسه بولي.