تاند(پنجشنبه، د جدې ۲۱ مه) یوې نسبتاً زوروې زلزلې، چې مرکز یې د هندوکش په غرونو کې وو، د افغانستان او ګاونډیو هیوادونو ګڼې سیمې ولړزولې.

د جرمني د زلزله پېژندنې ادارې پر اساس، د دې زلزلې، چې د افغانستان د غرمې په یوولس بجې او ۵۶ دقیقې وشوه، شدت د ریښتر په حساب ۶ اعشاریه ۴ درجې و.

خو رویټرز خبري اژانس د اروپا د مدیترانې د زلزله پېژندنې د مرکز پر اساس، د دې زلزلې شدت د ریښتر په کچه ۶ اعشاریه ۲ ښوولی دی.

د دې زلزلې ټکانونه د کابل په شمول د افغانستان په یو شمېر ختیځو ولایتونو او همداراز په پاکستان، تاجکستان، ازبکستان او هندوستان کې هم احساس شوي دي.

د دې زلزلې مرکز د بدخشان ولایت له مرکز فیض اباد  څخه ۶۷ کیلومتره لېرې تر مځکې ۲۰۸ کیلومتره لاندې ښوولی شوی دی.

تراوسه پورې د دې زلزلې له حکبله داحتمالي مرګ ژوبلو او تاوانونو په اړه کوم راپور نه دی ورکړای شوی.

وړمه ورځ هم په بدخشان کې زلزله احساس شوې وه چې شدت یې نننۍ ته ورته بلل شوی و.