تاند (پنجشنبه، د جدي ۲۱مه) د طالبانو د کانونو او پټرولیم وزارت سرپرست ملا شهاب الدین دلاور یو ځل بیا ادعا کړې، چې په افغانستان کې به د ټاپي پروژې چارې ژر پیل شي.
د هغه مطبوعاتي دفتر په یوه اعلامیه کې ویلي، چې په دې اړه په افغانستان کې د ترکمنستان سفیر خواجه عوضوف ورسره خبرې کړي او هرات ته یې په دې اړه د تخنیکي ټیم د راتلو موضوع یاده کړې ده.
سرچینه زیاتوي: « په دې کتنه کې د ټاپي پروژې د ارزښت، د ځمکو د استملاک، کابل ته د ترکمنستان تخنیکي ټیم د راتک او هرات کې د عملي چارو پیل لپاره د زمینه سازۍ په اړه هر اړخيزې خبرې شوې دي.»
طالبانو د ترکمنستان د سفیر له قوله ويلي دي: د ټاپي پروژې د تطبیق لپاره تر بل هر وخت ښه زمینه برابره شوې او موږ د دې پروژې ژر پیل ته ژمن یو.
د طالبانو د کانونو او پټرولیم وزارت سرپرست، ياده پروژه نه یواځې د افغانستان؛ بلکې د ټولو ښکېلو هېوادونو لپاره ګټوره بللې او ويلي يې دي چې ټول افغانان د دې سترې اقتصادي پروژې تر شا ولاړ دي او د دوی رژیم په دې برخه کې هر راز همکارۍ ته چمتو دی.
د طالبانو له بیا واکمنیدو سره، په پرله پسې ډول طالب چارواکي د یادې پروژې د ژر پيل خبره کوي، خو نیږدې دوه نیم کاله کېږي چې په دې برخه کې د عملي اقدام څرک نه لیدل کیږي.
ځینې څارونکي د نړیوالو لخوا د طالبانو د رژیم نه په رسمیت پېژندل په دې برخه کې اصلي ننګونه بولي.