تاند (چارشنبه، د جدي ۲۰مه) د افغانستان د پاسپورټ ریاست لپاره د طالبانو چارواکو ویلي، چې سر له نن چارشنبې به کابل کې د پاسپورټ د مراجعینو لیکلې عریضې ومني.
د دغه ریاست ویاند نورالله پتمن ویلي، چې پاسپورټ غوښتونکي دغه ریاست ته له خپلو عریضو سره ورتللی شي.
هغه زیاتوي، چې له کابل وروسته په نورو ولایتونو کې هم د لیکلو عریضو د منلو پلان شته.
روانه اوونۍ د طالبانو چارواکو وویل، چې د تخنیکي ستونزو له امله نور په انلاین ډول د پاسبورټ ترلاسه کولو سیستم ځنډول شوی او خلک به له لیکلو عریضو سره ورځي.
د خلکو غبرګونونه او اندېښنې بیا بېلابېل دي.
یو شمېر خلکو ویلي، چې په انلاین غوښتنلیکونو یې په یوه کال کې هم د پاسپورټ اخیستو لپاره د بایومیتریک چانس نه دی پیدا کړی، خو ځینو نورو بیا د لیکلو عریضو ور وړلو ته اندېښنه ښودلې او ویلي چې په دې توګه به پاسپورټ اخیستل ورته لا ستونزمن شي.
په افغانستان کې د جمهوري نظام له پرځیدو وروسته نیږدې هر افغان د پاسپورټ اخیستو هڅه کوي، چې د ډېرو دا هڅه په مختلفو دلایلو د هېواد پرېښودو لېوالتیا ګڼل کیږي.
په پاسپورټ اخیستو کې خلک د پراخ فساد د موجودیت ادعا هم لري، خو طالب چارواکي یې بې اساسه بولي.