تاند (دو شنبه، د جدي ۱۸ مه) د افغانستان د سوداګرۍ او پانګونې خونه وايي، سربېره پر دې چې د تېر حکومت پرتله په نړۍوال بازار کې د زعفرانو بیه لوړه شوې، د دغه محصول تولید هم په هېواد کې پراخ شوی دی.
د دغې خونې یوه مقام خان جان الکوزي ویلي، چې د هوایي دهلیزونو له لارې د زعفرانو د صادراتو زمینه برابریدل به دغه صادرات او عواید یې لا نور زیات کړي.
د طالبانو د صنعت او سوداګرۍ وزارت ویاند اخندزاده عبدالسلام جواد ویلي: « د افغانستان د زعفرانو تولیدات د تېر ۱۴۰۲ کال د لومړیو اتو میاشتو په لړ کې نږدې ۲۸ زره ۶۲۰ کیلوګرامه ته رسیږي چې پولي ارزښت یې ۲۷ میلیونه ډالره کیږي. زموږ ډېری صادرات جرمني، امریکا، بریټانیا، هند، سعودي عربستان، ترکیه، متحده عربي امارات، هسپانیا او نورو هېوادونو ته شوي دي.»