تاند (پنجشنبه، د جدې ۱۴ مه) پاکستانی چارواکو ویلي چې ډیورنډ کرښې ته څېرمه په تورخم کې له افغانستان سره د سوداګرۍ د وضعیت ښه کېدو لپاره یو اقتصادی مرکز جوړوي.
د پښتونخوا ایالت لپاره د پاکستان د اقتصادي مرکزونو د ادارې مشرانجينير جاويد اقبال خټک ویلي چې دا مرکز تورخم دروازې ته څېرمه په خیبر سیمه کې جوړیږي چې چارې یې په بشپړېدو دي.
یو شمېر افغان او پاکستاني سوداګرو د دغه مرکز د جوړېدو هرکلی کړی او سوداګرۍ ته یې دا مرکز ګټور ګڼلی.
ځینې افغان څارونکي بیا باور لري چې پاکستان ډیورنډ کرښې ته څېرمه د دروازو، سرحدي تاسیساتو او اقتصادي مرکزونو له جوړولو سره غواړي پر دغو سیمو خپلې منګولې لا خښې او په راتلونکي کې له دغو تاسیساتو او مرکزونو سره د افغان واکمنو توافق یا چوپتیا په خپله ګټه وکاروي.
د دغه مرکز د جوړېدو په اړه نور جزیات نه دي ورکړل شوي او نه یې په اړه د طالبانو د رژیم نظر ترلاسه شوی.
د افغانستان پر پرځېدلي جمهوري نظام له دې امله توندې نیوکې دي، چې د ډیورنډ کرښې په څېرمه سیمو کې یې د پاکستان د ورته هڅو پر وړاندې جدي او مسوولانه دریځ نه دی لرلی.
د طالبانو له بیا واکمنیدو سره، څو ځله په دغو سیمو کې د پاکستاني پوستو د جوړېدو د مخالفت او پر وړاندې یې د وسله وال غبرګون خبرونه ورکړل شوي.
افغانان ټینګار لري چې د طالبانو رژیم باید د پاکستان د دغو هڅو پر وړاندې ودرېږي او د سوداګرۍ د غوړېدو او نورو پلمو په ماهیت یې پوه شي.