تاند (سې شنبه، د جدې ۱۲ مه) د بلخ لپاره د طالبانو ځایي چارواکي وایي چې د ملګرو ملتونو د پراختیایي پروګرام په دې ولایت کې د شاوخوا یو میلیون امریکایي ډالرو په ارزښت ۲۵۵ باغونه جوړ کړي.
د یاد ولایت د کرنې ریاست د کرنیزو چارو مدیر محمد حسین عظیمي ویلي، یاد شوي پروګرام یوازې د بلخ په دهداي ولسوالۍ کې په ۲۰۲۳ میلادي کال کې د شفتالو، بادامو، الوګیلاسو او د انګورو ۱۰۸ باغونه جوړ کړي دي.
په ورته ورته وخت کې یو شمېر بلخي بڼوال د دغو باغونو پر جوړېدو خوښي څرګندوي او وایي، چې د ملګرو ملتونو د پراختیایي پروګرام له ملاتړ وروسته یې د مېوو په حاصلاتو کې څلور برابره زیاتوالی راغلی دی.
په بلخ ولایت کې د ملګرو ملتونو د پراختیایي پروګرام ساحوي مسوولین وایي، چې بڼوالانو ته یې د کافي اوبو د برابرولو په هدف، د دې ولایت په دهدادي ولسوالۍ کې د ۴۹۲ مترو په اوږدوالي او د ۱،۲ مترو په پلنوالي سره یې د اوبو یو کانال هم جوړ کړی دی.