تاند (سې شنبه، د قوس ۲۸ مه) ټاکل شوې چې د ملګرو ملتونو امنیت شورا سبا د افغانستان په اړه یوه ځانګړې غونډه ولري.
د افغانستان لپاره د ملګرو ملتونو د سرمنشي ځانګړي دفتر( یوناما) ویلي چې په دې غونده کې به د یوناما مشره رزا اتونبایوا هم ګډون او وینا ولري.
په وروستیو کې د ملګرو ملتونو سرمنشي انوتنیو ګوتریش د افغانستان د وضعیت په اړه د دغه سازمان غړو هېوادونو ته خپل راپور وړاندې کړی.
په راپور کې د طالبانو د رژیم یو شمېر لاسته راوړنې بیان شوي او ویل شوي چې د دوی مخالفې وسله والې ډلې کمزورې شوي او طالبان د افغانستان په امن کولو توانېدلي.
له دې سره، نیوکه شوې چې طالبانو لا هم د افغانانو د یو شمېر اساسي حقونو لکه: له زده کړو او کار څخه د نجونو او ښځو ستنولو، د واک انحصار او نورو مواردو ته دوام ورکړی.
سرمنشي ټینګار کړی چې د افغانستان لپاره دې د ملګرو ملتونو یو ځانګړی استازی وګمارل شي څو د بین الافغانی مذاکراتو د پیل همغږي وکړي او په دغه هېواد کې ټولو لوریو ته د منلو وړ یوه حکومت له جوړېدو سره روان ناورین مهار شي.
د طالبانو د بهرنیو چارو وزیر ملا امیر خان متقي بیا د سرمنشي د راپور زیاتې برخې مثبېت ګڼلي، خو دا وړاندیز یې رد کړی.