تاند (سې شنبه، د قوس ۲۸ مه)په کابل کې د طالبانو د رژیم ویاند ذبیح الله مجاهد وایي، د دوی د سوداګرۍ د وزیر به مشرۍ یوه پلاوي افغان پانګوالو ته له پاکستانه د پانګو د لېږد اسانتیاوې برابرې کړې دي.
د هغه په وینا، دا اسانتیاوې په هېواد کې د ځمکې د وېش په ګډون، د جوازونو د ترلاسه کولو، توکو د لېږدلو او پانګونې د لېږد په برخو کې دي.
ذبیح الله مجاهد وویل: « دغه کمېټه دنده لري چې هغه ځایه راستنېدونکو کډوالو ته د پانګونې په برخه اسانتیاوې برابرې کړي. موږ دا خپل مسوولیت ګڼو چې هغو کډوالو ته چې افغانستان ته راځي او پانګونه کوي، ځمکه ورکړي او دغه راز د جواز د اخیستلو او پیسو او مالونو د لېږد په برخه کې ورته اسانتیاوې برابرې شي.»
بل خوا، د سوداګرۍ او پانګونې خونې یوه مقام خان جان الکوزي ویلي ، اړتیا ده چې طالب چارواکي د پاکستان له لنډمهالي حکومت سره یوې هوکړې ته ورسېږي څو د افغان پانګوالو ټولې شتمنۍ له پاکستانه هېواد ته راولېږدول شي.
الکوزي په دې اړه وویل: « د پاکستان په اقتصاد کې شاوخوا ۳۵ سلنه برخه د افغانانو وه. موږ هلته په سلګونه کارخونې، د قالینو کارخونې، هوټلونه، ساختمانونه او ټرانسپورټونه لرل.»
طالب چارواکو نه دي ویلي چې په دې تړاو یې پاکستاني لوري سره خبرې شوي کنه؟
په پاکستان کې د څو لسیزې کډوالۍ پر مهال افغانانو په سلګونه میلیونه ډالره پانګونه کړې چې ویل کیږي خپله د طالبانو یو شمېر مشران هم په دغو پانګوالو کې شامل دي.
اقتصادي کارپوهانو د طالب چارواکو د څرګندونو هرکلی کړی، خو ویلي چې د عملي اقداماتو په تمه دي.