تاند (سې شنبه، د قوس ۲۸ مه) د طالبانو د بهرنیو چار وزیر مولوي امیرخان متقي د ملګرو ملتونو له لوري د افغان سولې لپاره د ځانګړي استازي د ټاکل کېدو له وړاندیز سره مخالفت کړی.

نوموړي خپل دغه مخالفت د افغانستان لپاره د برېتانیې له شارژدافیر رابرت ډکسن سره د لیدنې پر مهال څرګند کړی.

رابرت ډکسن د ډېرو نورو بهرنیو دیپلوماتانو په شان له قطر څخه خپلې چارې مخې ته وړي، خو وخت په وخت طالب چارواکو سره د لیدنو لپاره کابل ته هم په سفر ځي.

طالب وزیر نوموړي سره د لیدنې پر مهال ویلي چې د ملګرو ملتونو د سرمنشي د هغه راپور ډېرې برخې مثبتې بولي چې د افغانستان وضعیت پکې ارزول شوی.

له دې سره، ملا متقي د افغانستان لپاره د ځانګړي استازي د ټاکل کېدو د وړاندیز مخالفت کړی او ویلي چې داسې کوم استازي ته اړتیا نشته.

نوموړي وویل: اوس افغانستان په هره برخه کې ورځ تر بلې پرمختګ کوي، له ګاونډيو،سيمي او نړۍله هېوادونوسره ښې اړيکې لري اوهم یې هرچاته د تعامل دروازې پرانيستې دي،نو همداحالت باید تقویه شي.

د طالبانو د اعلامیې له مخې، د برېتانیا شارژدافیر په دې لیدنه کې یو ځل بیا د تاوتریخوالي له لارې په افغانستان کې د واک د بدلون د هڅو مخالفت کړی او ویلي چې په دې اړه دوی خپل دریځ په رسمي ډول اعلان کړی و.

د طالبانو منتقدان دوی تورنوي چې د سولې په سمه مانا یا نه پوهیږي او یا خلک او نړیوال غواړي په خپلو غلطو تعبیرونو او تبلیغاتو تېرباسي.

د دوی په باور، سمه ده چې افغانستان کې د طالبانو جګړه درېدلې، خو ثبات او سوله نه ده راغلې ځکه طالبانو د خلکو ازادۍ او ډېر اساسي حقونه تروړلي، واک یې انحصار کړی او د بشري او ښځینه حقونو د پراخ نقض تر څنګ یې افغانستان اقتصادي او بشري ناورین ته کاږلی.

د طالبانو منتقدان باور لري چې دا ډله د خپلو بدنامو مخالفانو له یادولو سره غواړي ځان افغانانو او نړیوالو ته محبوب وښيي، په داسې حال کې چې له توند لارو ملایانو جوړ شوی د دوی رژیم حکومتولي نه شي کولای او د دې وضعیت د بدلون لپاره د ملګرو ملتونو په محوریت بین الافغاني مذاکراتو ته اړتیا ده.