تاند (یکشنبه، د قوس ۲۶مه) د طالبانو د بهرنیو چارو وزیر ملا امیرخان متقي وایي چې امریکا متحدو ایالتونو او د دغه هېواد ملګرو په ځلونو ډاډ ورکړی چې د طالبانو د رژیم خلاف له نظامي حرکتونو ملاتړ نه کوي.
نوموړي نن دا خبرې په هرات کې د یوې غونډې پر مهال کړي.
دا په داسې حال کې ده چې له څه مودې راهیسې د طالبانو یو شمېر مخالفو څېرو په بېلابېلو هېوادونو کې خپلې ناستې زیاتې کړي.
طالب چارواکو دغو ناستو ته توند غبرګونونه ښودلي.
د طالبانو مخالفانو بیا د دوی پر وړاندې د طالب رژیم غبرګون د وېرې نښه ګڼلې، خو طالب چارواکو ویلي چې د دوی خلاف حرکتونه بې ګټې او بې پایلې دي.
تازه، د ملګرو ملتونو سرمنشي په یوه راپور کې وویل چې د طالبانو د مخالفو وسله والو ډلو حرکتونه کمزوري شوي.
له دې سره، یو شمېر څارونکي خبرداری ورکوي چې طالبان نه باید د بهرنیانو په داسې ژمنو مغرور او له خپل ملت سره روان ظلم ته دوام ورکړي.
د دوی په وینا، که د طالب ضدو حرکتونو بهرنی ملاتړ او د طالبانو خلاف د پخوانیو جنګسالارانو مخالفتونه نه هم وي، خو دوی په همدې ډول افغانانو سره په زور او جبر وغږیږي، پایلې به یې ورته ښې نه اوسي.