تاند (چارشنبه، د قوس ۲۲ مه)د افغانستان لپاره د امریکا شارژدافیره کېرن ډکر چې د قطر له دوحې فعالیت کوي، د افغانستان د پرځېدلی جمهوري نظام د ولسي جرګې د رئیس میر رحمان رحماني او د هغه د زوی اجمل رحماني په تړاو د امریکا د تازه بندیزونو په اړه غبرګون ښودلی.
نوموړې ویلي چې د دوی دغو پراخو درغلیو هم متحده ایالتونه او هم افغانستان ولوټه.
شارژدافیرې کېرن ډکر میر رحمان رحماني او اجمل رحماني دواړو ته په اشارې زیاتې کړې چې د هغې په خبره رحمانیانو/Rahmanis هغه میلیونونه ډالره غلا کړي چې د افغانستان د امنیتي ځواکونو د ملاتړ لپاره ځانګړي شوي وو.
کېرن ډکر د دغو پراخو درغلیو په برخه کې د امریکا د خزانې وزارت او د افغانستان د بیا رغونې لپاره د امریکا د مرستو پر سر د څار ادارې یا سیګار د موندنو یادونه کړې ده.
د افغانستان لپاره د امریکا د سفارت شارژدافیرې پر رحماني د امریکا له خوا د مطرح شویو تورونو خلاصه د یوه عکس په بڼه په خپله ایکس پاڼه خپره کړې ده.
د امریکا بندیزونو ته د میر رحمان رحماني غبرګون – تاند (taand.net)
د امریکا د خزانې وزارت د بهرنیو شتمنیو د کنټرول ادارې اوړمه شپه اعلان وکړ چې د افغانستان د پخواني جمهوري نظام پر دوو چارواکو، د ولسي جرګې رييس او د هغه پر زوی یې بندیزونه ولګول.
د امریکا د خزانې وزارت پر اساس، دواړو رحمانیانو د قراردادونو د پړسولو، د وارداتو په مالیې کې د درغلۍ، د درغلیو په قضیو کې د لاس لرلو، د تېلو د غلاوو او په ولسي جرګه کې د درغلۍ په شمول په بیلابیلو او ګڼو برخو کې فساد کړی دی.
دا وزارت همداراز وايي چې میر رحمان رحماني د تېلو په قراردادونو کې بیې لوړې ښودلي، تېل یې بې مالیې وارد کړي او د مالیې پیسې یې خپل جېب ته اچولي او د غلا په پیسو یې ځان د افغانستان ولسي جرګې ته رسولی او حتي په رشوتونو یې ځان د ولسي جرګې ریاست ته رسولی دی.
د امریکا د خزانې وزارت وايي چې د رحماني د فساد شبکه ډېره پراخه ده او حتي تر جرمني، قبرس، متحده عربي اماراتو، استرالیا، هالنډ او بلجیم پورې رسیږي.