تاند (دوشنبه، د قوس ۲۰مه) ټاکل شوې ده چې د ملګروملتو امنیت شورا نن (دوشنبې) د افغان ښځو او نجونو د وضعیت په اړه غیرعلني غونډه وکړي.
د امنیت شورا دایمي او غیر دایمي غړي به په نننۍ غونډه کې د افغانستان د وضعیت د ارزولو لپاره د سرمنشی د ځانګړي استازي فریدون سینیراوغلو پر وړاندیزونو هم غور وکړي. ده خپل وړاندیزونه د یوه راپور په چوکاټ کې د تېرې اوونۍ د چهارشنبې په ورځ / د قوس ۱۷، د دسمبر ۶ مه/ د امنیت شورا غړیو ته وسپارل.
ویل کېږي چې د سینیراوغلو په وړاندیزونو کې د نجونو او ښځو د کار او زده کړو د اجازې په وړاندې د طالبانو د حکومت د رسمیت پېژندلو په شان موضوعات شامل دي.
د دې راپور د مسودې له مخې چې رسنیو ترلاسه کړې، سینیرلي اوغلو د طالبانو له حکومته غوښتي چې نجونو او ښځو ته د زده کړو او کار حق ورکړي.
د ده په ارزونه کې همداراز ویل شوي چې په ټولو نړیوالو سیسټمونو او ټولنو کې د افغانستان د بیا شمولیت لپاره افغان مېرمنې باید په ټولنه کې د ګډون او مشرۍ حق ولري.
په ارزونه کې دا هم راغلي چې نړیواله ټولنه باید د افغانستان د څو میلیارد ډالرو کنګل شوې شتمنۍ د آزادولو لپاره یوه بېړنۍ حل لاره ومومي.
د امنیت شورا په غونډه کې به څو افغان ښځې هم خبرې وکړي.
تېره اوونۍ ملګروملتو وویل، تمه ده په دې غونډه کې به د افغانستان لپاره د ملګروملتونو ځانګړې استازې روزا اوتونبایووا، پر افغانستان د بندیزونو د کمیټې مشر او د مدني ټولنو یو استازی خبرې وکړي او ورپسې به بحثونه دوام وکړي.