تاند (پنجشنبه، د قوس ۱۶ مه) د ملګرو ملتونو د کډوالو عالي کمېشنرۍ په یوه تازه راپور کې ویلي چې نیږدې درې نیم میلیونه افغانان په هېواد دننه او نیږدې ۵ نیم میلیونه نور لا هم په بهرنیو هېوادونو کې کډوال دي.
دغې ادارې په نوي راپور کې د داخلي بې ځایه شویو احتمالي شمېر ۳،۲۵ میلیونه او له هېواده د بهرو کډوالو شمېر ۵،۵۳ میلیونه تنه ښودلی.
یاده کمېشنري په هرات کې وروستۍ زلزلې اوله پاکستانه د سلګونه زرو افغان کډوالو ډله ییز ایستل په دغه هېواد کې د بشري او اقتصادي ناورین د زیاتیدو لامل ګڼلی او اړمنو سره یې د عاجلې مرستې غوښتنه کړې ده.
دا په داسې حال کې ده چې د طالبانو له بیا واکمنیدو او په کلیوالي سیمو کې د دوی د جګړې له پای ته رسېدو سره یوه لویه برخه خلک هم د سیمو د امنیت له امله یې او هم په ښارونو کې د ژوند د دوام د وس نه لرلو له امله خپلو اصلي سیمو ته ستانه شوي.
طالب چارواکي د کډوالۍ او بشري ناورین دواړو په اړه ضدو ونقیضې خبرې کوي چې د څارونکو په باور، د دې ستونزو د اساسي حل پر وړاندې خنډ شوي.
د طالبانو د کډوالو وزیر خلیل الرحمان حقاني روانه اوونۍ ننګرهار ته د سفر پر مهال پرته له دې چې په هېواد کې اقتصادي او بشري ناورین رد یا تایید کړي، د دې ناورین پر بحث کوونکو د نیوکې په ډول وویل چې په افغانستان کې د بشري ناورین یادونه کوي.
ایران، پاکستان، ترکیه د ډېره برخه بهر مېشتو افغان کډوالو کوربانه هېوادونه دي چې ډېر ځله یې دغو کډوالو سره د ناوړه چلند خبرونه هم خپریږي.