تاند (پنجشنبه، د قوس ۱۶ مه) له ناوړه چلند سره، له پاکستانه د افغان کډوالو د ایستو د راپورونو په غبرګون کې د پاکستان د پوځ لوی درستیز عاصم منیر له دغه چلنده په دفاع ویلي چې دوی په ډېر درنښت افغان او نور ناقانونه کډوال له خپل هېواده وباسي.
جنرال منیر د بې اسناده افغان کډوالو د ایستلو په اړه د موقت حکومت د پرېکړې د ملاتړ په ترڅ کې ویلي چې دا فیصله د پاکستان ګټو ته په پام شوې ده.
د پاکستان د پوځ مشر په یوه وینا کې ټینګار وکړ چې بهرنیان د پاکستان امنیت او اقتصاد په جدي ډول اغېزمنوي.
بل لورته ته: افغانستان لپاره د پاکستان ځانګړی استازی اصف درانی ویلي، د اکتوبر له پیله تراوسه پورې نژدې څلور نیم لکه افغان کډوال خپل هیواد ته ستانه شوي دي.
ده په عین حال کې وویل چې په پاکستان کې ۲ میلیونه او ۲۰۰ زره اسناد لرونکي افغانان اوسي چې یو میلیون او ۴۰۰ زره یې کډوال دي.
د پاکستان د کورنیو چارو وزیر په شمول ځینو چارواکو ویلي چې په بل پړاو کې به اسناد لرونکي کډوال هم له خپلې خاورې وباسي.
ریچارډ بینیټ پاکستان کې له افغان کډوالو سره چلند د اندېښنې وړ بللی
د افغانستان د بشري حقونو د وضعیت لپاره د ملګرو ملتونو ځانګړي راپور ورکونکي ریچارډ بینیټ په پاکستان کې له افغان کډوالو سره د پاکستاني چارواکو پر چلند اندېښنه څرګنده کړې ده. بینیټ پرون په خپله اېکس پاڼه لیکلي، چې دی او نور کارپوهان له پاکستانه غواړي چې د افغان کډوالو د ساتنې لپاره حیاتي ملاتړ ته دوام ورکړي. نوموړي زیاته کړې، دوی له افغان کډوالو سره د پاکستان اوسني چلند او د استولو اړوند ستونزو ته اندېښمن دي. بینیټ دغه څرګندونې وروسته له هغې کړې، چې پرون یې په جنیواکې د ملګروملتونو له یو شمېر نورو کارپوهانو او ځانګړو راپور ورکونکو سره په غونډه کې برخه درلوده او له پاکستانه یې په زوره د افغان کډوالو د ایستلو پر مسلې خبرې وکړې