تاند (چارشنبه، د قوس ۱۵ مه) د افغانستان لپاره د متحدو ایالتونو ځانګړي استازي ټام وېسټ د سیمې یو شمېر هېوادونو ته د خپلو تازه سفرونو د لړۍ د پيل خبر ورکړی.
نوموړي په خپله اېکس( پخواني ټویټر) پاڼه کښلي چې دا سفرونه یې پرون د دسمبر په پنځمه پيل شوي او تر پنځلسمې به دوام ولري.
پاکستان، متحده عربي امارات، سعودي عربستان او قطر د دغو سفرونو هدفونه ښودل شوي.
د طالبانو د رژیم ویاند ذبیح الله مجاهد ویلي چې دوی هېوادونو سره ښې اړیکې غواړي او نه پوهیږي د امریکا استازی له کومې اجنډا سره د افغانستان په تړاو سفرونه پيل کړي.
ویسټ پر داسې مهال دا سفرونه پيل کړي چې په وروستیو کې د افغانستان ستونزې او د طالبانو رژیم سره د نړیوالو د تعامل څرنګوالی د یو شمېر سیمه ییزو او نړیوالو ناستو په پام وړ موضوع بدله شوې او ورسره د طالبانو د رژیم پر ضد یو شمېر هېوادونو کې غونډې پيل شوي.