تاند (چهارشنبه، د قوس ۱۵ مه) په تورخم کې د یوې لوحې پر سر د اختلاف له حل کېدو وروسته د تورخم دروازه د باري موټرو پر مخ پرانیستل شوه.
دا لاره تېره شپه هغه مهال بنده شوه چې د طالبانو ځايي چارواکو د پاکستان له لوري له صفري نقطې د افغانستان خوا ته د یوې لوحې پر نصبېدو اعتراض وکړ.
په تورخم کې یوه پاکستاني چارواکي چې نه یې غوښتل نوم یې خپور شي، پاکستاني رسنیو ته ويلي چې دا لار د دواړوو خواوو ترمنځ تر خبرواترو وروسته خلاصه شوې ده او اسناد لرونکي خلک پرې تګ راتګ کولی شي. د دغه چارواکي په وینا، يوه جنجالي لوحه بورډ ليرې کړل شوې ده.
باختر خبري هم د تورخم د کميسار مولوي عصمت الله له قوله ويلي چې، تېره شپه ناوخته پاکستاني لوري غوښتل تورخم دروازې ته څېرمه د افغانستان خوا ته شل متره رامخکې د لوحې په پلمه يوه بله دروازه جوړه کړي چې دوی يې مخه نيولې ده.
د باختر اژانس په خبر کې ويل شوي دي، وروسته له هغه چې طالبانو د پاکستان له لوري د نوې نصبېدونکې لوحې مخه ونيوله، هغوی يې په غبرګون کې د ټرانزيټ په مخه دروازه وتړله.
بل خوا په تورخم دروازه کې د کرښې پورې خوا ته د سوداګرو يو استازي ایمل شينواري وويل، د پاکستان حکومت د تورخم دروازه له تېرې شپې راهيسې بنده کړې ده.
د تورخم دروازه داسې مهال تړل کېږي چې تېره اوونۍ هم پاکستاني لوري د تازه مېوو بار وړونکو موټرو پر مخ ياده دروازه درې ورځې تړلې وه.