تاند(یکشنبه، د قوس ۵ مه) د ایران خبري اژانس ایرنا ویلي چې د طالبانو رژیم سره یې هېواد د هلمند سېند د اوبو په اړه ګډه کاري کمېټه جوړه کړې ده.
سرچینې په دې تړاو نور جزییات نه دي ورکړي.
د طالبانو د رژیم چارواکو هم په دې تړاو څه نه دي ویلي.
د طالبانو د اوبو او برېښنا وزیر عبدالطیف منصور څه موده مخکې ایران ته په سفر ورغلی و.
د طالبانو د رئیس الوزرا اقتصادي مرستیال ملا برادر اخوند هم ایران ته د سفر پر مهال ویلي وو چې ایران سره د اوبو په اړه خبرې دوام لري.
ایران د طالبانو له بیا واکمنیدو راهیسې ادعا کوي چې د هلمند سېند اوبو نه کافي برخه نه ورکول کیږي، خو طالب چارواکو د دې کار دلیل د سېند د اوبو کمیدل ښودلي.